Fagnaði 104 ára afmæli sínu í Mörk
Theodór Jóhannesson sem býr á heimilinu Hugheimum í Mörk fagnaði 104 ára afmæli sínu í gær. Aðstandendur hans komu færandi hendi með veitingar og gjafir og dagurinn var hinn ánægjulegasti í alla staði. Til hamingju kæri Theodór. Ekki margir sem ná þessum áfanga, að fagna 104 ára afmæli sínu.
Vinkonur í 65 ár
Það eru 65 ár síðan þessar konur kynntust í Húsmæðraskólanum við Sólvallagötu, veturinn 1952-1953. María Eggertsdóttir, heimiliskona í Mörk, er í þessum skemmtilega saumaklúbb og hélt boð fyrir vinkonurnar um daginn á fyrstu hæðinni í Mörk Dóttir Maríu, Halldóra Ingólfsdóttir, sá um veitingarnar að þessu sinni.
Réttardagurinn tókst vel
Í gær var réttardagur í Mörk og mikið húllumhæ. Leikskóla börnin úr Steinahlíð gæddu sér á grjónagraut í hádeginu og voru forvitin þegar Gísli Páll Pálsson, forstjóri í Mörk, kom á fjórhjólinu inn um dyrnar, klæddur eins og smali og vel skeggjaður en hann er nýkominn úr smalamennsku af fjöllum. Þá var bðið upp á slátur í hádeginu og einhverjir skoluðu herlegheitunum niður með brennivínsstaupi og pilsner. Eftir að Gísli Páll hafði sagt frá smalamennskunni sýndi hann stuttmyndina Réttir eftir Mattia Reiniger og Tom Bolwell en þar er Gísli Páll í aðalhlutverki. Að lokum var dansað í salnum á 1. hæð en Markarbandið kom og lék fyrir dansi.
Réttardagur í Mörk
Á morgun, þriðjudaginn 12. september, höldum við Réttardag Markar. Börn frá leikskólanum Steinahlíð koma í heimsókn í matsalinn á 1. hæð og syngja fyrir okkur upp úr kl. 10.00 og borða síðan með okkur. Forstjórinn og smalinn, Gísli Páll Pálsson, kemur beint úr smalaferð og mætir með skítugt fjórhjólið, smalafötin og allar græjurnar og segir okkur frá smöluninni í hádeginu. Markarball verður síðan haldið klukkan 13.15.